يا طالع الشجرة

ياطالع الشجرة

هاتلي معاك بقرة

ماخلاص مابقاش هزار

وعادي نلاقي البقر

بعيد فوق على الشجر

وياللي على الشجرة طالع

قوللي ليه طالع ...

وعلى إيه بتطالع

لو ماكانش على البقرة

لساك عندك أمل

تشوف ضحى بكرة

لساك .. وبجد

عندك أمل في الغد

ييجي بساعاته الجديدة

يصلح اللي خرب

ويفتح اللي إنسد

------------------

وللا يمكن طالع فوق

بعد مازهقت من الأرض

بعد ما عجّزت وشاخت

وإنطفى في قلبها النور

دلوقت طالع الشجرة

تجرب عيشة الطيور

ماعادش باقي على الشجر

ولا حتى ريش عصفور

هجروها وسكنوا شجر جديد

شجر غصونه من حديد

هجروا الأوكار والعشش

هجروا الوشوش

سابوا زيف البشر

و سكنوا فوق الدشوش

سابوا الحياة والخضرة

اللي فوق الشجرة

وسكنوا في الخراب الأكيد

إن كان قريب أو بعيد

-----------------

وللا طالع تدوّر عاللي تاه

تنادي وتقول يا ولداه

حدش شاف إنسان

ماشي تايه حيران

حدش إلتقاه

كان فايت من هنا

كان قاعد عندنا

حسينا وإحنا معاه

براحة في قلبنا

----------------

وللا يمكن طالع وناوي

تقعد على غصنها

وتكتب الحكاوي

عن دنيا العاشقين

اللي هيا كلها

ورد وشجر ياسمين

وتقول غناوي عن المجروحين

اللي في ليلهم سهرانين

والقمرة بتلالي

وإنت فوق في العالي

بتغني وتروي الشجرة

بالدمع الحزين

----------------

تكونش طالع تقصّها

وتشيلها من جدرها

ماعدش ليها فروع

والقلب بات موجوع

تعبانة وكلها علة

مالها لازمة دي الشجرة

ماعدتش تطرح ثمرة

ولا ترتجي منها ضلة

---------------------

يا طالع الشجرة ...

يا طالع الشجرة

بصلي لما بانادي

دانا إيديا في إيدين ولادي

وبانادي

على كل رايح وكل غادي

وباقول

قبل ما تعرق الأيادي

وبانادي

من غربتي وبعادي

باصرخ في ليل سهادي

على أرض أجدادي

أرض طه ونجيب

أرض فاطمة وهنادي

راح تعودي يا بلادي

راح تعودي لخضارك

ولبسمة صغارك

لولادي وولاد ولادي

وتفرحي ياصبية

بالطرحة والجلابية

وتلبسي توب فرحتك

ويّا طرحتك

وتمشي حدا الدار

ساعة المغربية

وتفرّحي كل البشر

اللي طالع واللي نازل

وتكيدي كتير عوازل

وماتنساش ياللي طالع

أيوه إنت ياللي فوق

لإني مش هاتنازل

تحلب وتسقيني

بمعلقة من بلدي

مش بالمعلقة الصيني